Imnaryong Metodista Kapampangan

King Pusu Ku Atin Tula 
(There Comes to My Heart, HE 109)

King pusu ku atin tula, metung a mayubung mala
Ulit-ulit kung pawaga, ibat banuang payapa. 

Koro: 

Kayubu na, ning kapayapan banua, 
At lalu yang makayama, ning Diyos itang lugud na. 

Kang Jesus karin ku kimtan, ing kapayapan kung sakdal
Utang ku keang beyaran king keang kamatayan.

Inyang tinggap ke I Cristo  meligaya na ing bie ku,
King tulang wagas miglapo a pigkalub ning Ginu. 

Ngeni mabibie kung lubus king kapayapan nang Jesus
'Ti ku siping ning Mangabus inya ala kung takut. 

_______________________________

Banal! Banal! Banal!
    (Holy, Holy, Holy)

Banal! Banal! Banal! Diyos a makapayan,
Mukyat arapan Mu, dalit ming kapuriyan!
Banal! Banal! Banal! Sukat  panaligan,
Ibpa, Anak, at Espiritung Nuan.

Banal! Banal! Banal! Ding sasalpantaya,
Keka ro daraun, gintu rang korona.
Kerubin, Serafin, pawa lang sasamba.
King Alang Mula at Alanangga.

Banal! Banal! Banal! Nung dulum man takap.
Nung ding kekeng mata, e raka asulyap.
Ikang bukud banal, kekami pakayap.
Sakdal king linis, upaya’t lingap.

Banal! Banal! Banal! Diyos a makapayan!
Muri king lagyu Mu sabla mung lelangan.
Banal! Banal! Banal! Sukat  panaligan,
Ibpa, Anak, at Espiritung Nuan. Amen.

_________________

PANALANGIN A MAYUBU
    (Sweet Hour of Prayer)

 Panalangin a mayubu, panalangin a mayubu;
 Ausan na ku keting yatu, ban king Diyos sabla yaklis ku;
King oras ning dusa’t lasa,  mipasno ya ing kaladua;
At king tuksu miligtas ya,  king panalangin uli na.

Mayubung pamanalangin,  mayubung pamanalangin;
Idurup Mu ining daing,  king kalam a katutuan pin,
Makayatna yang kaladua, king kalam makapanaya;
Dios king sabla aligan ‘Ya,  king pamanalangin mibata.

King pamanalangin a wagas, king pamanalangin a wagas;
Tanggapan ing tulang ganap, karin king katasan ibat;
Ing piblas laman isakwil, ban mibangun munta karin;
Keka manatili ku pin,  O mayubung panalangin.  Amen.



Iti Pin Yatu Ne
(This is My Father’s World)

Iti pin yatu ne, ning kanakung Ibpa,
Sablang melalang daralit, a mitmu king tula;
Iti pin yatu ne, ning kanakung Ibpa,
Deting bage mayayakit, lelangan nong sabla.

Iti pin yatu ne, ning Ibpa kung malam,
Ding ayup, aslag at lirios, pawa reng pupurian.
Iti pin yatu ne, ning Ibpa kung malam;
Lon mu, daralan ya ing Diyos, atin yang sasabian.

Iti pin yatu ne, Ibpang Mayupaya,
Marok nung malimbuyu man,  Ya ing mamahala.
Iti pin yatu ne, Ibpang Mayupaya,
‘Bat lungkut ka’t mitakutan, King Diyos magtiwala. Amen.


Purian Ya ing Ginu
(Praise to the Lord the Almighty)

Purian ya ing Ginung Hari ning meto lelangan,
Kaladua ku purian me, Ya ing kekang sikanan!
Ikong sabla Ing Keang templo luban,
Makiabe ko king kapurian.

Purian ya ing Ginung sasakup king sablang bage,
A lulukub keka at mimingat king kekang bie.
E mu ikit? Sablang nasa mu’t pake,
Iti ngan malam nang babie.

Purian ya ing Ginung keka babie pangapala,
Tune king aldo’ldo kayantabe meng mausta.
Isipan mu, ing Diyos a mayupaya,
Kasiguruan me at tula. Amen!



Ing Kekang Kayarian
(I Love Thy Kingdom Lord)

Ing Kekang kayarian, kaku bina yang mal;
Ing iglesia mung beyaran king daya mung banal.

Ing kekang iglesia keka binang mal ya,
Uling yang mabie tanda na ning piaku mung sala.

Iti yaklis ke pin, ampon panalangin,
Kasuyuan ku keya yain, angga king iti mamin.

Ing kakung pigagap ing turu nang mayap,
Lugud pamikakapatad, idalit, ipalkas.

Anggang ‘tiung katutuan, ing piling balayan,
Keti’t king banuang kayarian tanggap yang kapurian. Amen!   



 Matula Sasamban Daka
 (Joyful, Joyful We Adore Thee)


Matula sasamban daka, Diyos ning lugud at gloria.
Pusu mi anting sampaga, bubukadkad la keka.
Itabi mung sablang lulam, lungkut kapikakunuan.
Talapamie kaligayan, bie mi king bie mu katmuan.

Sablang dapat mu pupuri, ligaya keka babie,
Batuin at angel gagale, kapurian alananti.
Marangle bunduk at gutad, at mayalun a dagat,
Batis, ayup a magkoplas, muri keka managkat.

Malam ka at mamatawad, inya nuan ka karing lat.
Sibul na ning tulang wagas, malalam alang kabas.
Ibpa raka at I Kristo, Mangabus miya’t Ginu.
Mikalugud ke sang tau, Kalupa ning lugud Mu.

Itang sabla, magum tangan, king gale ning kapurian.
Tala ning munag pigmulan, dalit meto ketawan.
Sumulung kabang kakanta, managumpe king dusa;
Purian ta yang maligaya, Diyos ning lugud at gloria. Amen!


Uli na Ning Leguan Da
(For the Beauty of the Earth)


Uli na ning leguan da, ning labuad at ding banua       
At uli na ning lugud, keke makapatulug   
Ginu, pupurian Daka, king dalit ming maula!

King leguan da ding oras, aldo, bengi, at abak
Gubat, bulaklak, bunduk, bulan at talang lusuk,
Ginu, keka paukiat, puri mi’t pasalamat.

Uli ning pakamal da, ding kapatad mi’t matua
At ding kakaluguran, at pamisip a banal
Ginu, yain mi Keka, kapurian, pamanyamba.

Uli ning iglesia mu, nung nu ke manigapu,
Idaraun ming lubus, ing daun na ning lugud;
Yayain mi O Ginu, lugud pamipayubu. Amen!


 Maslag a Jesus
(Fairest Lord Jesus)

Maslag a Jesus king sabla sasakup,
Anak ning tau at ning Diyos,
Ikang luguran, ikang igalang; kaladua ikang pagduglan.

Maslag lang parang lakuas king kakewan,
Miayo-ayo la king linang;
Jesus maslag Ya, maigit tindag na, king pusu yang paligaya.

Maslag yang aldo bulan magparayo,
Palkasan lang batuin babo; lakuas yang maslag
Jesus a wagas;   Karin king banua titindag. Amen.


Samban yang Ari!
(O Worship the King)


Samban yang  Ari king tulang banal,
king upaya na’t lugud parangal.
Talapamingua yang e matitikal,
makapuk king damla at puring dakal.

Ing yatung mitmung pagmumulalan,
king upaya mu malam lelangan.
Layun tinatag king kekang kaburian.
Pibablas king dayat a mitmung leguan.

King mal mung ingat ninung mipasyag?
Yang bie ning angin, sala ning aslag.
Ibat king bunduk mame king patag,
King ambun at uran, yumu at tindag.

Ikaming maina mistulang gabun,
Aligan mi ing tapat mung ampun.
Pakalulu mu ganap susunsusun.
Miglalang mi’t saup, Mangabus at Pun. Amen.


Metung Yang Matibe Kuta
(A Mighty Fortress is Our God)

Metung yang matibe kuta, ing Dios a mayupaya!
Yang sasaup mamatula, busal sakit at lugma.
Dapot ing kasalang, imbut na manyintang,
Ganap ya bigsikan; tungkul king sengilan, ala yang akatimbang.
King sikanan tang sarili, e ta pin managumpe,
Nung eta ya mu kayabe, ing mepiling magwagi!
At iti ninu ya? Cristo Jesus pin ya?
Ginu sulip banua! Alpha ya’t Omega!  Ing pamanyambut Kea.

Yatu mitmu ya mang diablo, mitakutan e ta mu;
Uling yang buri ning Ginu, Ing katutuan magbabo.
King pun na ning pisak, galgal eta sukat,
Bagsik na malumak, lubus  yang misaldak king  Amanung mipasyag.

King Amanung makapayan, alang makasanggalang;
Ing Espiritu na’t kalam, ibabie nang panabang.
Paulagan tamu, ampon bie-milako;  katawan malaso;
Diling alang sepu, Ing kayarian ning Ginu. Amen

O Nung ‘Tin Kung Libung Dila
(O for a Thousand Tongues to Sing)

O nung ‘tin kung libung dila,   purian keng mausta; 
Ing Dios ku’t  Aring maramla,   malam karing sabla.

O Pekapun ku at Ginu,  ing saup ibie Mu;           
Ban asaplala keng tutu,  lagyu Mu king yatu.

Iting nuan a lagyung Jesus,  sasaulan nang takut; 
Itatabi Na ing lungkut,  at sablang sigalut.

Yang babie pangatimawa,   karing taung dusta;
Alilan nang bie payapa, mabunga matula.

Purian Ye sablang kinayap,   king sakit at dawak;
Ing kayapan Na ipasyag,  ning nuan a Magligtas. Amen.



Ing Pusung Pupuri King Diyos
(O For A Heart to Praise My God)

Ing pusung pupuri king Diyos,  pusu yang mikabus;
Metung yang pusung meluglug, king daya nang Jesus.

Pusu yang ‘ting kapanisian, at kapaniwalan;
Mamintu ya kapilan man, king Mangabus a nuan.

Pusu yang lubus mibayu king lugud ning Ginu
Sakdal ya’t ganap king yubu; likas ya kang Cristo

Ing bie Mung banal, O Jesus, kaku mu itugtug,
Bakas Mu tukian kong lubus, king bie kung mikabus.


Lipat Albugan
(Beyond The Sunset)

Lipat albugan, malagung abak, neng akayabe ing Magligtas;
Sindak miangganan, magmulang tapat,  lipat albugan, ing bie wagas.

Lipat albugan, lulam ala na, takut mapupus, karin banua;
Aldo biang nuan at maligaya, lipat albugan, nuan a gloria.


Lipat albugan, Ya tairan naku, siping ning Ibpang, lusuk yubu;
Nung akayabe mune ing Ginu, lipat  albugan, o kayubo!

Lipat albugan, akit munala, ding minuna na king ligaya;
Pamikawani karin ala na,  lipat albugan, nuan a gloria. Amen.

Bilangan Mung Kekang Kanuanan

       (Count Your Blessings)

Ngening ing bie mu tiu king kasakitan

At isipan mung sabla mewala ngan

Lon mu’t bilangan ing kekang kanuanan,

Pagmulalan me Diyos king Keang depatan. 

Koro: 

Bilangan mung kekang kanuanan, 

wa, bilangan mung tunggal-tunggal,

Bilangan mu ping tunggal-tunggal, 

Pagmulalan me Diyos king Keang depatan. Amen!

Kababayatnan ka king kekang lingap?

Ing krus mung pusan bina yang mabayat?

Ing kanuanan mu bilangan mung mayap, 

Lungkut mu mialilan king tulang ganap. 

Nung mibusal ka man king pamipamuk, 

E ka tatakut malapit ya ing Diyos,

Ing kanuanan mu bilangan mung lubus, 

Tipang angeles keka la sumaup. 

Mitulad Kusa King Maestrong Mal

       (More Like the Master)

Mitulad kusa king Maestrong mal

King kamung lub na’t kapibabatan.

Sipagan, dapat tune katapatan,

King pangatalaga king Keang kayarian.

Koro: 

Ing pusu ku Keka ke yayampang 

Ing pusu ku, lubus mu neng bandian;

Linisan me at pakabanalan, 

ingatan meng alang kapupusan. 

Mitulad ku sa king kakung Ginu,

King panalangin at kasuyuan ku;

Pusanan ke ing krus na aldo-aldo,

Suma’p mikalat balitang mayubu. 

Mitulad ku sa king nuan a Jesus,

King meakit Nang bie mitmung lugud;

Ing kasakitan piakuan kung tibubus,

King babo tumba ating pamanyambut!

O Kawal ng Kristo, Sumulung Kayu 

       (Onward Christian Soldiers)

O kawal ng Kristo, sumulung kayu, 

Anti king labanan krus yang tanda yu;

Ing pun ta’ng i Jesus, mumunang lubus,

King pamakilaban lon ye ing Keang krus.

Koro: 

O kawal ng Kristo, sumulung kayu, 

King pamakilaban, krus yang tanda yu. Amen. 

King kalam at lugud, iglesia ning Diyos

Sumulung matutus, kambe nang Jesus;

Metung mung pamiagum metung ya ing pun

Metung ya ing payul, ing lugud metung!

Trono at korona, mangapupus la, 

Dapot ing iglesia manatili ya;

King infiernu pa man e ya masintang,

Gingkas nang Cristong nuan e pin magkulang. 

O Zion Magmalagwang Tupad King Misyun 

(O Zion,  Haste)

O  Zion magmalagwang tupad king misyon,  

sabian king ing Ginung Diyos sala ya, 

At ena tula ning mabie Mangabus, 

a ninu mang tau magdusa ya.

Koro:

Nuan a balita: Kapayapan! 

I Jesus ya pin ing Magligtas ta ngan! Amen. 

Lon yu, libu-libu lang pakalugmuk king sukulan ning dawak at sakit 

Alang mamalita king ing Mangabus king uli ra, piaku Na ing sakit. 

Sabian iti karing sablang balayan, king ing Diyos a Miglalang lugud Ya;

Yulat king piaku na ngan ing kababan, at mete Ya ban ding sabla mie la. 

Miuman yang datang O Zion saganan me, 

At sabian mung mabandi nang kalam;

Sabla nang linigtas keta akit de; 

lupa Nang makaslag king kanuanan. 

Tinikdo Ya I Cristo!

(Christ the Lord is Risen Today!)

Tinikdo ya I Cristo, Aleluya!
Ikong sabla dalit yu, Aleluya!

Itas yu ing kapurian, Aleluya!
Banua at yatu dalit, Aleluya!

Ginu tamu mabie ya, Aleluya!
Kamatayan simbut na, Aleluya!

Ban sabla miligtas la, Aleluya! 

King sumpa ning parusa, Aleluya!

Pangayatbus miganap, Aleluya!
At minyambut ing mayap, Aleluya! 
Layun biklat Neng Cristo, Aleluya! 

Pasbul ning paraiso, Aleluya!

Ngeni malyaring lungub, Aleluya!
At makiagum king Ginu, Aleluya!
Tukian ing delanan na, Aleluya! 

Cruz, kutkutan at gloria. Aleluya! Amen!

 Pakoronan Taya Ing Kordero Ning Diyos

      (Crown Him with Many Crowns)

Pakoronan taya, ing Kordero ning Diyos

O mayubung gale banua, Kea la dudurup.

Kaladua dalit ka, king keka Mengabus!

Hari yang alang kapara, alang pangapupus. 

Pakoronan ye ngan ing Ginu na ning bie!

Ing menyambut mekilaban, mete kaibat mebie!

Ing depat na purian, ipasyag, igale!

Mete ya pin ban mie ta ngan, ban e tana mate. 

Pakoronan yeng ‘lat, Ginung mayupaya, 

Ing gulu ba’nang mituknang, tahimik lang bansa

Magluid alang wakas, lugud at ganaka

At keting labuad mikalat ing bie mitmung tula. 

Pakoronan taya ing Ginu ning lugud, 

Ginung mibata king dusa king babo na ning krus

Sabian tang sabla Kea, “Luid ka O Mangabus!

Kapurian Mu alang angga, Alang pangapupus!” Amen!

Neng Lawan Ku Ing Lelangan Mu Ginu

      (How Great Thou Art)

Neng lawan ku, ing lelangan Mu Ginu 

ing malang depatan ding gamat Mu

Iting yatu, at ding batuin king babo, 

King kapanyamban keka mitmu ku. 

Koro:  

Keka O Diyos, masayang ikulio,
kasagid na ning lugud Mu.                        

Keka O Diyos, masayang ikulio
kasagid na ning lugud Mu. Amen! 

Neng isipan ke ing krus ning kalbaryo, 

nung nu naku siklungan ning Ginu, 

King kapanisian ngakung mangamanu, 

sasamban daka, O nuan a Kristo. 

Panyatang Mu, Ginu, kambe ning biga 

ding banal Mu keka la sagana. 

Kasakitan, ku mialilan king tula, 

makiagum ku keka, kabang-kaba.

Jesu Kristo Yang Buntuk

(The Church’s One Foundation)

Jesu-Cristo yang Buntuk, ning iglesia ning Dios;  

Tinatag Ne’t binilug, king upaya’t lugud; 

Ibat banua peintun ne, ban maging kakasi,

At inatbus Neng tune, king sarili nang bie.

Mepili balang bansa, metung lang mausta;          

Aral na karing sabla, alang pangakabla;

Metung ya mu ing Ginu! Yang panaligan yu;

Kea samba, mamintu; sumap ya kekayu.

Busal pamakipagkal, ing iglesiang banal,

Ausan nong taung dakal, sumisi’t magbanal; 

Iti alang patugut, Keang ibibekut, 

Anggang e ya manyambut, mipanuanan king Dios.

Manatiling iglesia, uling atiu Kea

Ing Dios a pakilala, ‘ting Atlung Persona! 

Mangaintulid ke sana, miagum king iglesia,

A mabie pamiagum da, ding sasalpantaya. Amen.   

Bina Ka Ping Tapat

(Great is Thy Faithfulness)

Bina ka ping tapat o Diyos ku’t Ibpa, 

E ka pin painggulut bitasa;

Manatili lunus mung e kakati,

Nung nanu Ka e mibayu iti.

Koro: 

Bina ka ping tapat, bina ka ping tapat, 

Ing lunus mu bayu balang abak. 

Sablang kailangan pagkalub mung ganap, 

Bina ka ping tapat, nanung yablas? Amen.

Kaleldo’t kauran, sablang lelangan, 

At pati na saslag king katasan, 

Magpatutu, tapat kang e mu nanu;

Malugud at mapamakalulu. 

Ing kapatawaran at kapayapan, 

A pagkalub Mu - kapanatagan, 

Makatatag ngeni parasan bukas. 

O kanuanan ku a alang kabas. 

Jesus King Lugud Dinatang

(In Loving Kindness Jesus Came )

Jesus king lugud dinatang, king kaladua babie kalam:

Layun segip na naku man busal kasalanan.

Koro: 

King babo ning balas leko, timpak ketang mabie batu;

Inya ngeni panatag ku uli ning lugud ning Ginu. Amen.

Maluat na nakung ausan, dapot e ke pin piramdam:

Pibata na ‘kung liguran ning Mangabus a nuan.

Piyaku na itang dusa ban mayangu ku king sala,

At ban kaku aibie na ing bie alanangga.

King matas a kapatagan karin ngeni ing kabiayan!

King kakamtan kung kanuanan Jesus yang migkalam.

E Ku Manalig Kenu Man

        (My Hope is Built)

E ku manalig kenuman nung emu kang Jesus a Nuan

Alang bukud kapanayan, nung e mu kaya pamisan. 

Koro: 

Yang batung mabie i Jesus ing sabla balas mung lalbug, 

Ing sabla balas mung lalbug. Amen.

Ngening takap na ing dulum king Keang kalam payampun

Ing siguada nung daragul, Kea ku lubus magkanlung.

At ing sampat pangaku na, iligtas naku king  sala,

Nung mimina yang kaladua, pasap ku at manalig Kea.

Nung matiup ne ing  trumpeta, Kea lumapit kung agad,

King kabanalan na miblas, king bie alanangga tanggap. 

Pastul Ming Talapatnube

(Saviour Like A  Shepherd Lead Us)

Pastul ming talapatnube, ingat mu pagnasan mi; 

King pastulan mu mie kami, lingap mu iparati.

  Nuan a Jesus, nuan a Jesus,  daya mu yang penatbus;

  Nuan a Jesus, nuan a Jesus,  bandi mu na keng lubus.

Gawan mu keng kaluguran, banten mu ke king dalan;

E ke sa lapastangan   pailili king kawan.

 Nuan a Jesus, nuan a Jesus,  tingiran mung dalung mi,

 Nuan a Jesus, nuan a Jesus,  tingiran mung dalung mi.

Ing tula mu’t kaburian agad ming panintunan;

Mangabus at Ginu ming nuan, king lugud mu ke katmuan.

 Nuan a Jesus, nuan a Jesus, tune pin mal ke keka; 

 Nuan a Jesus, nuan a Jesus,  tune pin mal ke keka. Amen.

Ginu Oini Ining Bie

     (Take My Life and Let It Be)

Ginu oini ining bie Keka tatalaga ke, 

Kuanan mo dening gamat  king ban Keka la sumap

King ban Keka la sumap. 

Kuanan Mo dening bitis ba’lang tuntun matulid, 

Siwala ku kuanan Mu, ban muri king Ari ku, 

Ban muri king Ari ku. 

Labi Keka lang kuanan nasa Mu ba’rang sabian. 

Ing bandi’t salapi ku, gamitan Mu ngan Ginu,

Gamitan Mu ngan Ginu. 

Kuanan Mung kakung lugud, at Keka ku pabukud, 

Kuanan Mu ing sarili ban Keka manatili, 

Ban Keka manatili.  Amen.

Keka Ku Ginu Aus Mu Dimdam

      (I am Thine O Lord)

Keka ku Ginu, aus mu dimdam, lugud Mu keang sasabian;

Dapot ing kakung kapanaligan, lakuas dakang luguran. 

Koro: 

Inya Ginu, ilapit Mu ku, king krus a kepakuan Mu;

King kekang krus ilapit muku Ginu,

Ban kamtan pakalulu. Amen. 

Italaga Mu ku king kasuyuan, ing kalam Mung kadiosan,

Ing kaladua ku ikang aligan, kaburian Mu pamintuan. 

Kaligaya ning metung mung oras, king kekang trono miras,

Ing pinyiklaud king kekang arap, ligayang e kukupas. 

Binang malalam ing kekang lugud, e ku lubus ataruk;

Ing kekang tula e ku ayabut, anggang e keka lauk. 

Matula Ku King Kapurian King Ginu

(I am Happy In the Service of the King)

Matula ku king kasuyuan king Ginu, matula ku matula ku. 

Tula’t kapayapan kaku tutuki, king kasuyuan king Ari. 

Koro: 

King kasuyuan king Ari, karin ku bukud tuki;

Atin kung tula’t kanuanan, king kasuyuan king Ari. Amen! 

Matula ku king kasuyuan king Ginu, matula ku, matula ku. 

King sala at king dulum daralit ku, king kasuyuan king Ginu. 

Matula ku king kasuyuan kang Jesus, matula ku, matula ku;

Ing sabla Kea yain ku ngan lubus, king kasuyuan kang Jesus. 

Matula ku ling kasuyuan kang Cristo, matula ku, matula ku;

Panatag at maligaya ing bie ku, king kasuyuan kang Cristo.

Sibul Ning Sablang Kanuanan

(Come, Thou Fount in Every Blessing)

Sibul ning sablang kanuanan, pusu ku kekang bandian;

Batis ning kapakaluluan,  sukat Kang parañgalan!

Ituru mukung mikanta, karing gale ning banua;

Kilub ning Kekang Iglesia, purian Kang alanangga!

Keti itas kong gamat ku, ban keka manigapu;

Pamiparangal sa Ginu, miras king arapan Mu.

Segip na kung Jesus a nuan, ‘niang tiku lual ning kawan

Binayad Na dayang banal, king kakung kaligtasan

O Dios, karagul ku utang! Keka e abayaran;

Nanung yain ning alipan, arapan ning Pañginuan?

Oini ing pusung balisa, gapusan Me, Keka ya,

At layun tatakan me pa, king tatak makabanua. Amen. 

Ing Lugud Ku Ginu, Dagdagan Mu

       (More Love to Thee O Christ)

Ing lugud ku Cristo, ing lugud ku,

Layun tingiran Mu dalangin ku;

Ining panigapu, arapan Mu Ginu,

Ing lugud ku dagdagan Mu. 

Ing tula  ning yatu yang pignasan;

Keka Mu ikit ku ing kanuanan. 

Ing panalangin ku arapan Mu Cristo,

Ing lugud ku dagdagan Mu. 

Pabustan lumabas ing pagsalbat, 

Salisi ing sampat keting sindak. 

Lubus idalit ku, ing lugud ku Cristo,

Ing lugud ku dagdagan Mu.

At king paglako ku keti yatu,

At karin king banua muli naku;

Abe da ding angel, dalit ku king Ginu,

Idalit ku ing lugud Mu. 

Jesus Mayap Yang kaluguran

     (The Best Friend is Jesus)

Jesus mayap yang kaluguran, pakayap king pusung sugatan;

Lubus neng pasiknangan ding atiu king kaskupan,

Jesus mayap yang kaluguran.

Koro: 

Jesus yang kakaluguran, Jesus yang kakaluguran, 

Kea maus ka’t magsakdal, lubus yang makiramdam;

Jesus mayap yang kaluguran. Amen. 

Kang Jesus akit ku ping tutu, kapayapan ning kaladua ku;

Bie mapagal mipasno nung Kea pasapupu,

Jesus yang kakaluguran ku. 

Kanyang mitipun tana banua, a kagum da detang minuna;

Idalit tamu Kea ing puring alanangga,

Ketang maligaya nang gloria. 

Lumakad Tamu King Sala Ning Lugud

     (Walking in the Blessed Light)

Lumakad tamu king sala ning lugud, dalan king pusu tula nang Jesus;

King pamaglakad ya ing talasaup, angga king banua ning Diyos.

Koro:

Tara ayan ya, yang masaya at matas a banua; 

Saup nang Jesus, makayantabe lubus. Amen. 

Libak na’t piraya niting sikluban, alang ulaga king daralanan;

Iting sabla eku pin pikanlapan, uli nang Jesus a nuan. 

Lisian ing dapat a pamikasala, ampon lumakad king kaburian na;

At mie lubus king pamikalugud Kea, tuparan lang aral na. 

Daptan king tula iting pamanlakad, a painturu king bayung siyudad; 

Itas yang bandila ning pangaligtas, angga king banua sadsad. 

Nukarin Man I Jesus Yang Kayabe

      (Anywhere With Jesus)

Nukarin man i Jesus yang kayabe,

Yang mimingat kaku kung yatung iti;

Ipanlualu na ku karing keang takde;

Nukarin man e ku tatakut ume.

Koro: 

 Jesus, I Jesus ya ing kayabe, 

Inya nukarin man panatag ing bie. 

Nukarin man ing tuksu e takutan,

Agyang ing diablo ‘tiu king daralanan;

Nung I Jesus yang kayabe king dalan,

Maging ligaya pati kasakitan.

Nukarin man e ku magdili-dili,

Jesus kayabe ke nu ku man ume;

Malungkut a dalan nung darasan ke,

King masiglang dalit kea gagale.

Nukarin man malyari kung matudtud,

Agyang dasan ku dulum a mamuput;

Kayabe kea mu sa ing Ginung Jesus,

Migising king tulang e mapupupus

Daptan Mu Ginu Ing Buri Mu

        (Have Thine Own Way)

Daptan mu Ginu ing buri mu, ikang lilinis king sala ku;

Yayus me ing bie mal kung Ginu, anggang  ‘tiu keni, manaya ku. 

Daptan mu Ginu, kekang nasa, pusu ku Keka pausisa,

Keka yang putian anting biga, at king katas lub, mawas ku sa. 

Daptan mu Ginu ing buri, uluan meng sugat ning pusu ku, 

Sablang upaya Keka Ginu; talnan Mu ku mu, Kumayap ku. 

Ing kaburian Mu, Kekang daptan, maluka kung bie kekang talnan, 

Espiritu mu kekang pabal, at ing pusu ku ban mikatmuan. 

Kang Cristo Agad Ume Naka

      (Come to the Savior)

Kang Cristo agad ume na ka, ngeni pin atyu abe taya, 

Ausan na katang lumapit Kea, “Ume ko keni.” ngana!

Koro: 

O kaladuang mibabayatnan, nanung kekang kapikakunuan?

Mangabus keka yang lapitan, ba’kang mipanuanan. 

Baket makiarap dili-dili? King sigalut ampon palsimi?

Ba’t king ligalig manatili? Lumapit ka ngeni.

Aus na e mu pikanlapan, ing agkat na kekang tanggapan, 

Magkang bukas ala nang lugal, lumapit kang dapal!

Lugud Na Ning Diyos Lalapo

      (Love Divine, All Love Excelling)

Lugud na ning Diyos lalapo, tinipa keting yatu. 

Mekiagum ya karing tau, kipmuan yang pakalulu.

Ginung Jesus malugud ka, lugud mu alang angga.

Ikabus muke king sala, pusu mi bandian mula.

Panabang meng Espiritu, karing pusung magulu, 

Pamanan muke sa Ginu, ketang kapainawan mu. 

Dawak mi ilako muna, maging Alpa’t Omega.

Pigmulan asadsad sana, bie mi itimawa la.

‘Me keni Talapangabus, kalam mu ipagkalub;

Miuman makiagum kang lubus, kekami e titikus.

Panuanan da kang parati, at ika mung suyuan mi;

Dalanginan at ipuri, lugud mung alananti.

Arian mu ing kekang dapat, gawan muke ping wagas;

Kekami mu ipamalas tune ming pangaligtas.

King susun-susun a gloria, iras mu kami banua. 

Ding korona mi kanita, arap mu idaun la. Amen!

Atin Tang Balita Karing Bansa

      (We’ve a Story to Tell)

Atin tang balita karing bansa, pusu ra ibalik do sa;

King wagas, katutuan at tula, kapayapan at sala, 

kapayapan at sala. 

Koro: 

Ing dulum king munag mialilan, at ing munag king kaugtuan; 

Kanita datang neng kayarian, ning aslag ampon kalam. Amen. 

Karing bansa atin tamung dalit, pusu ra barong ibalik;

King Ginung malam at lawit, ban ing marok mapulid, 

Ban ing marok mapulid. 

Karing bansa balita yulat ya, king ing Ari na ning banua;

Jesus keti binie na Ya, ban pakit: Diyos lugud ya.

Ban pakit: Diyos lugud ya.

Karing bansa sabian yeng Magligtas, dinalan sakit at sindak;

Ban ding pekapun ning labuad king katutuan la miras. 

King katutuan la miras. 

Tapat Yang Karame I Jesus

    (What A Friend We Have In Jesus)

Tapat yang karame I Jesus king dusa tamu’t lungkut

Uli na sabla adurup king dalangin ta king Dios:

  Ala tamung karatunan, masna tang kasakitan,

  Kulang ta kapanaligan maus king Dios a malam.

Atin tang subuk at tuksu? Maliligalig tamu?

E ta sukat paigulu,  king Ginu manigapu;

  Kakaluguran ala na darame antimo ya,

  Ing keinan tamu balu na,  inya idalangin kea.

Maina ta’t kababayatnan king yatu kalingunan?

Ing Mangabus yang lapitan, ausan at dalanginan;

  Nung ding sadiang kapanalig  keka la paimburis,

  King Ginu ka pin lumapit,  lunus kea mu akit. Amen.

O Katunayan Jesus kaku Ya

(Blessed Assurance Jesus is Mine)

O katunayan Jesus kaku Ya, sampat napin mo nitang ligaya

King kaligtasan ku magmana, uling mewas ku king daya na. 

Koro:

Iti yang bie ku ampon dalit, purian keng Ginu ulit-ulit

Iti yang bie ku ampon dalit, purian keng Mangabus kung lawit. Amen. 

Kabud misuku ing bie ku kea, abatio kuna itang ligaya

Ding angeles kaku yatad da , ing pakalulu at lugud na. 

Tinggap kuna ing kapainawan, aku king Ginu matula ku’t nuan. 

Manenaya ku ban mikatmuan, king Keang lugud at kayapan. 

Penintun Nakung Jesus

(Sweeter as the Years Go By)

Penintun nakung Jesus, ‘niang tiku king sala, 

King kalam dela naku, kilub santungan na. 

Pakalulu nang matas, matas pa king banua;

Malalam pa king dagat, ing kalalaman na. 

Koro: 

Yuyubu la ding banua, a susuyu tamu Kea;

Mabandi’t mayubu, Jesus ing lugud na;

King panyulung ding banua.  Amen. 

Likbayan neng Judea, king minunang aldo;

Ing balayan linapit, ban damdam king Ginu,

Magsalbat metula la, bulag menakit tutu;

At ganap ing lugud na, pepakit na kaku. 

Pagmulalan Keang lugud, king bie king uli na;

Yang lubus  tune miaku, king sakit at lasa;

Kagum ding banal banua, itas tang puri Kea, 

Ban king banua at sulip, mipaligayan ya. 

Jesus Magpun Ya Numan Karin

      (Jesus Shall Reign)

Jesus magpun ya numan karin saslag yang aldo maningning, 

Kayarian na laganap pin anggang saslag la ding batuin. 

King paroba’t paralaya, ding principes manibat la

Maluka at mangabiasa ban king Ginu la ngan samba. 

Kea ta dalangin sukat kapurian Kea itumpak

Lagyu Na mirangal tapat king ain ta balang abak.

Ding dai at sablang dila ing lugud na ibalita

Ding anak muri lang sabla  king lagyu nang masaplala.

Ing melalang pabustan pin, king Hari muri at main.

Tipa la’t dalit ding angel, ing labuad makibat, “Amen!”  Amen!

Pangisnawanan Mu, O Diyos Ining Bie Ku

        (Breath on Me Breath of God)

Pangisnawanan Mu, O Diyos ining bie ku, 

Ba’kung aluguran tutu, palugud mu kaku. 

Pangisnawanan me, pusu kung dalise, 

At keka isuku ing bie, mamintu kung tune. 

Espiritung Banal,  O  pangisnawanan, 

Ban mabilug kung katawan, magningning king kalam. 

Espiritu ning Diyos kaku mu pagkalub,

Itang bie e mapupus, kayagum nang Jesus. Amen.

Maging Kanuanan 

      (Make Me a Blessing)  

Lual karing dalan ding mangabiayan, dakal la ding mapagal

Sabian balita ning kaligtasan, karing misasakitan. 

Koro: 

Maging kanuanan, maging kanuanan!

Pakit  king bie, Jesus a nuan!

Maging kanuanan, ing Ginu suyuan!

King parang tau, maging kanuanan! Amen!

Ibalita ing mala ning bie  na, Cristong Mengabus keka,

Dakal la ding taung salpantaya, nung king tungkul tapat ka. 

Malam kang munie karing aliwa, at lugud kang matula,

Saup kang ayaligan ding maina, king Diyos magtapat ka sa. 

Ikayung Pasalamat 

       (Come Ye Thankful People Come)

Ikayung pasalamat, ing dalit yu ipalkas, 

Pablasang ngeni miras, ing pamupul king silbag;

Ginung Diyos ya ing babie, king kekatang pagkabie, 

Inya ngeni Kea ume, pasalamat ta ibie. 

Manene tang isipan, marangle yang linalang,

King aldo yang pasilang, ‘Ya murin ing pauran;

Sikanan ding magobra, at bining sasalbag da, 

Deti ngan babie nala, Ibpa ta’ng atyu banua. 

Makananung magkaimut kening Ginung malugud, 

Sabla babie na’ng lubus, king ban e ta  dumanup;

Tara marap matula, king Diyos a mapagpala,

Ban yain ta ing sabla, pibandian, bie at diwa. Amen.