Imnaryong Metodista (Bayung Salin a Dalit King Kapampangan)

Bayung likas a imno king Kapampangan nang Ptr. Jess Alvarado
______________________ 

Ing Diyos nang Abraham,  Kekatamung Purian
(The God of Abraham Praise, UMH116, Tune: Leoni )

Ing Diyos nang Abraham, kekatamung purian
Ginung alang kapupusan, Diyos a Banal!
Linalang king sala, king labuad at banua,
Dalit kayu’t samba, purian yang Lagyu na.

Karing pangaku na, lubus magtiwala
Ing bie tamu’t pangisnawa, pigkalub na,
Ing katapatan na, balu ding malugud Kea,
Keti yatu at king banua mipuri ‘Ya.

Ngeni lumakad ku,  king dalan ning Ginu,
Ume kung duku arapan ning Keang trono,
Tangalan ke lupa, siklaud at samba,
King Ginung alang kapara - sumuyu Kea.

Luid ya ing Ginu, Diyos ning meto yatu,
Ing upaya ning lugud na tinggap tamu,
Banal, banal, banal! Diyos ya kapilan pa man,
Ngeni, napun, bukas,  Iya ing Alanangga!
______________________ 


Ing Malating Silab
(Pass It On)

Ing malating silab, dagul, aping mikalat
At ding sulung saslag,  sala ing isasalbag
Kalupa na ning lugud na ning Diyos a Magligtas
Ding tanggap Kea miligtas la. Ing Ginu purian ya!

Kalagung pagmasdan, sampaga at tanaman
Ayup daralit la, Dios karelang pupurian
Jesus tune ing lugud na, kanaku at keka
Ing pusu ku, magpuri ya, “Ginu malugud ya.”

Dalangin ku O Dios, ding kakung kaluguran,
Ausan mula Ginu, ban tanggap kaligtasan
At makyabe king kapurian,  ing Ginu ‘Yang samban,
Kaburian mu yang pamintuan ding kekang lelangan.

Sablang anak ning Diyos, mekeni at lumapit
Miagnan king kapurian, magkanta tamu’t dalit;
Ginung Jesus mipuri Ya, samban ya at itas,
Ing lugud na ning Magligtas,  kekayung ipalkas!

_______________________

Kekaming  Ibpa 
(O God in Heaven)

Kekaming Ibpa, Lagyu mu Banal,
Datang king sulip Kekang kayarian
Daptan mu Ginu, kekang kaburian,
Banua at sulip mipamintuan.

Ibie mu Ginu, kekeng pamangan
At king aldo’ldo, sablang kailangan
At patawaran king kasalanan,
ban mamatawad kami naman.

King tuksu Ginu, ‘lisya mu kami,
at king dewakan iligtas kami;
At  ing kayarian, at kayupayan
sablang dangalan, iti Keka  ngan!  Amen!

_______________


Malagung Abak
(Morning Has Broken)

Malagung abak ing tula ganap,ayup magpuri king Magligtas.
Samba at dalit, sabla lumapit,king Diyos at  Ginu banua’t  sulip.

Ing aldo saslag, sala mikalat,  at king katasan misasalbag,
Sabla daralit, ding keti sulip,  abe ning banua king kapurian.

Leguan ning sala, dulum mawala, mitmu king tula’t kapayapan;
Sabla sumuyu, Kea mamintu.   King Diyos at Ginu na ning yatu.

Kalagung abak, banua mibablas sala ning Ginu alang kupas

Tara lumapit, samba at dalit , king Ginung Ari, banua’t sulip. Amen!

___________________


Pangalto da ring Sampaga
(Hymn of Promise )

Pangalto da ring sampaga, ‘tin panayan a bunga.
At king bie alang kapara, ing banua akamtan ya.
Ngeni busal man ning lungkut, manenaya ya’y Jesus.
Ing galal Keang iyabut, karing ‘ting lugud king Diyos.

‘Ting dalit, ating ikanta, balu da karin banua,
Potang ding keti peinawa, at karin muli na la.
E ta man agyung isipan, ing tagumpe ning kalam,
Bie pigkalub ning Ginung Nuan, bie yang alang angganan.

King paglako tamu keti, king banua karin muli,
E ta ya bale ing keni, ing bie e taya bandi;
Ing sabla magbalik king Dios, at ing tagumpe lubus,
Ding menalig king Mangabus, mie lang e na mapupus. Amen!

_______________________

Nung Bie Ku’t Kabilyan 
(It is Well With My Soul)

Nung bie ku’t kabilian, ngeni  mialunan  at  nung pagsubuk magbabo.
Nanu mang bili ku, kanakung sabian, “King Ginu, payapa, king Ginu.”

Koro:
Payapa, king Ginu,
Payapa, payapa ing bie Ku. Amen.

Sundang ning kalaban, at nung subuk datang?
Ing kasiguruan kanaku;
Iti ing amanu ning Ginu kung Nuan,
“Payapa, e daka pin lakuan.”

Nung dawak sumakup, salake ing lungkut,
E ke pin kalinguan ing Dios!
Uling king Kalbaryo, iyang menyambut.
Kaladua, payapa ka king Diyos.

Ginu, panayan ku’ng aldo datang ka,
at karin banua mukyat ku;
Abe ding angel, kapurian dalit ku,
purian me kaladua, ing Ginu.

_____________________

Dalit Kayung Kapurian! Aleluya, Amen!
     (Come, Christian,  Join to Sing)

Dalit kayung kapurian,  Aleluya !   Amen!
At ing Diyos ya ing samban, Aleluya ! Amen!
Magkantang mitmung tula, purian ye ikong sabla! 
Ing Ginu isaplala!  Aleluya !   Amen!

Samban ye ing Ginung Nuan!  Aleluya !   Amen!
King mitmung katapatan!  Aleluya !   Amen!
Ing Ginu yang magbante, mimingat king kekang bie!
Malugud ya ping tune,  Aleluya !   Amen!

Samba kayu’t magpuri.  Aleluya !   Amen!
Ing Ginu ya ing Hari.  Aleluya !   Amen!
Purian ye aldo’t bengi, king pusu yu at labi;
At Kea manatili, Aleluya !   Amen!

Luguran tayang tune, Aleluya, Amen!
Ing Ginung magkalub bie, Aleluya, Amen!
Pasalamat Kea ibie, at samban tayang tune,
Lagyung Jesus purian ye! Aleluya, Amen!

Magkanta kong masikan,  Aleluya, Amen!
Ikayung mipanuanan. Aleluya, Amen!
Ing Ginu iyang purian, sulip at king katasan!
Purian ya ing Ginung nuan, Aleluya, Amen! Amen!

_____________________


Nanung 'Kamtan Nung Salpantaya Ku? 
(And Can it Be That I Should Gain? / Amazing Love)  

Nanung 'kamtan, nung salpantaya ku?
King Anak na ning Diyos, Jesus a Ginu?
King daya na, mikabus ku King dawak at sala, miligtas ku.

Koro:
Makapagmulalang lugud,
King uli  ku, mete ya ing Ginu kung  Jesus.
Makapagmulalang lugud, king uli ku, mete ya king krus.  Amen.

Diyos  a banal, ing Ginu ning banua
King aske ning tau,  tiu ya tinipa,
Ban ding sabla miligtas la, king dawak, at sala, mikabus la.

Ngeni Kea, ganap manalig ku,
Ing Ginu ning banua, ‘tiu ya pusu ku;
Kasalanan ku milako, purian ke, suyuan ke, kabang bie ku!

____________________________

Bandi Neng Jesus ing Kanakung Bie

                 (Living For Jesus)

Bandi  neng Jesus ing kanakung bie,

Iya, yang kaku tune matnube;

Mitmu yang tula, ining pusu ku,

Kakung kanuanan, nung ‘Yang suyuan ku. 

Koro: 

O Ginu pengaku ku, sumuyu kung tapat, 

Tuki ku keka Jesus, O kakung Magligtas;

Bandian me’ng pusu ku’t bie, sabla daraun ku,

Bukud mung Ika ing samban, Mangabus ning bie ku.  Amen.

Sabla daraun ku king Mangabus, pisanan ne’ng krus, ba’ kung mikabus;

King mitmung lugud, dimdam ke’ng aus, “Kaku tuki ka!” Tuki ku Jesus. 

Tukian ke’y Jesus, nukarin pa man, ding Keang utus eko kalingwan;

Kasakitan man nung dalanan ku, tuki kung tapat, Kea mamintu. 

Bandi neng Jesus  ing kanakung bie, tukian keng tapat, sumuyung tune;

Ding  milaut Kea, tairan kong tutu,ban miligtas la’t tanggap king Ginu. 

____________________  

Ing Lugud na Kanaku Ning Ginu

         (Now I Belong To Jesus)

Ing lugud na kanaku ning Ginu, e pin kumupas, e pin magbayu;

Sariling bie yang pigkalub na, panatbus king sala. 

Koro: 

Ngeni ‘ti ku kang Cristo, sabla Keya yain,

King paglako ku king yatu, banua ing dasan pin. Amen.

Ibat king dungis ning kasalanan, pibablas na ku king kabanalan,

Ding gamat ku tatairan nala, inya ing bie ku Kea.

King pusu ngeni atin kung  tula, Miligtas ku king pamikasala;

Ing pangakabus ku ngeni lubus, atyu ku kang Jesus. 

Mabibie ngeni king kapanayan, karin king banua ‘tin kung tuknangan, 

karas karin abe nong Jesus, ding kea mikabus.

_____________________ 

Kakung Tinguanan Tuki Kung Lubus

(I Have Decided To Follow Jesus)

Kakung tingwanan, tuki kung lubus, 

at Iyang tukian, bukud I Jesus

Laus king lub ku, ing ibalaus, 

maging tapat  king Mangabus. 

Tuki kung tapat, uling balu ku, 

‘Yang katutuan at lakas ning bie ku.

Pamikasala lakuan kung tutu, 

‘Ya nang Ginu na ning bie ku.

Makilaban ku, e ku pin murung, 

‘giang kalian daku, pilit sumulung;

At king bayung bie, ngeni lalabung, 

 Jesus king pusu maratun.

Ibat na ngeni, ‘Yang pamintuan ku, 

i Jesus kabud, ya mu ing Ginu,

Suyuan keng tapat, kabang mabie ku. 

Ing Mangabus ku at Cristo. Amen.

__________________ 

Mabie Yang kakung Ginu 

(He Lives)

Mabie yang kakung Ginu, atiu ya king yatu, 

Tune mabie ya’y Cristo, ito asaksian ku!

Gamat nang mitmung lugud, kaku no ‘inabut;

Iyang kakung Mangabus, kakung Jesus!

Koro: 

Mabie, mabie, mabie ya ing Ginu!

Kasabi ke’t kayabe ke, king bie keti yatu. 

Mabie, mabie, mabie ya ing Ginu!

Ing sangkan bakit balu ku! Atyu king pusu ku! Amen!

King yatu kayabe ke ing malugud kaku, 

At nanu man ing gulu, aku panatag ku;

Iyang kaku matnube neng malungkut ing bie, 

Inya balu kung tune, kayabe ke. 

Tumula kong Kristiano, sabian king dalit yu, 

“Aleluya kang Kristo, Iyang Hari tamu!”

Iya ing kapanayan, ning meto ketawan, 

At iya ing katutuan, Iyang samban!

_________________________ 

Bisa Ku Ping Dalit Patungkul Kang Jesus  

(No One Ever Cared For Me Like Jesus)

Bisa ku ping dalit patungkul kang Jesus

Ngening tinggap ku na ing pangayatbus;

Nung makananu nang ing bie ku binayu,

At nung makananu na kung linigtas.

Koro:

Ala yang kalupa pin I Jesus, kakaluguran ya ping tapat;

At nung makananung ing bie ku mibayu,

A Keya ping linigtas.  Amen.

 Pusu at ing bie ku pin mitmu king sala,

‘Niang atagpuan na ku ning Ginung Jesus;

Karing gamat nang malugud, inabut na,

At tinaid na ku king kayarian na.

Kayabe ke aldo l’do ngeni I Jesus, 

Tatairan da ku ding Keyang Amanu

Tune melunus ya kanaku ing Ginu,

At yang tinggap ku, lugud nang masaklo.

______________________ 

Tagumpe Ku King Ginu

 (O Victory In Jesus)

Atiu king kasulatan, dake ning kasaysayan, 

Sablang depatan ning Ginu karin king kalbaryo.

Tune yang migkasakit, krus binuat ne ping pilit,

Ban anguan naku king sala at milub ku banua. 

Koro:

Tagumpe ku king Ginu, Magligtas ke I Cristo

King daya na melinis ku karin king kalbaryo. 

Linigtas nakung tune, kaya na ing kakung bie,

Ing lugud na tune kaku, tagumpe king Ginu. Amen! 

Ing depat nang kasuyuan, pekayap nong salunan

Bulag a keang inulu, deti abasa ku;

“Malunus ka o Kristo”, aus ning kaladua ku,

At mekibat ya ing Ginu, Ing tagumpe kaku.

‘Tin kung balitang dimdam, tungkul king kaligtasan.

King banua ating tuknangan a kanakung ulian;

Angel daralit karin, king Ginung mitmung lambing,

Abe ra dalit ku naman, tagumpe ning kalam!

________________   

Atin Kung Dalit King Pusu Ku

(In My Heart There Rings A Melody)

Atin kung dalit king pusu ku, dalit yang ibat king Diyos,

Sisibul ing tula king pusu ku, dalit tungkul kang Jesus. 

Koro: 

Dalit yang patula king pusu, 

Tungkul ya king lugud na kaku ning Ginu; 

Dalit yang patula king pusu,

Tungkul ya king lugud ning Diyos. Amen.

Mal ya king pusu ku I Cristo, yang migligtas kanaku,

Binayu neng lubus ining bie ku,  inya Kea dalit ku! 

Patungkul king Ginu, dalit ku, king lugud nang masaklo

Karin banua angel makyabe ku, at Kea pasapupu.  

_______________ 

 Aku’ng Diyos a Linalang

     (Here I am Lord)

Aku’ng Diyos a linalang, king sulip at katasan

Dimdam ke ing balen kung manigapu.

Lelangan ko ding batuin, ban sunlag lang maningning

Ninu ing itubud Ku karing tau?

Koro:

Aku Ginu, ing ‘tubud mu, dimdam ku O Diyos ing aus Mu;

Makasadya kung mamintu, ban daptan, kaburian mu  Ginu.                                                                                   Amen.

Lelangan ku ing uran, ing gabun at tanaman, 

Balen kung manalangin, dinan pansin;

Ban ganap lang mamintu, dinan kong bayung pusu,

Ninu ing itubud  ku king balen ku?

Akung Diyos  na ning sala, iligtas ko ding sabla, 

Mikasala, sagipan, at  panuanan, 

Tanggap lang pakalulu, ban ganap lang mibayu, 

“Ninu ing itubud ku?” Nganing Ginu.   

___________________ 

Dalit Kong Kapurian!

(To God Be The Glory)

Dalit kong kapurian, Ginu yang suyuan!

Ing Diyos na ning banua Iya ing samban;

Sabla pigkalub na, bignus na’ng kalam,

Babo ning yatu mika kaligtasan.

Koro: 

Ing Ginu yang purian at pamintuang tune

Ing Ginu yang purian, ‘tin tang kaligtasan;

Lumapit king Ibpa, uli nang Kristo,

Uling meyatbus tana king kalbaryo. Amen.

Ing daya ng Jesus bukud a lunas,

King dawak at sala iyang memayad;

Maging king parusa dapat kung tinggap, 

Babo na ning krus pisanan nang ganap.

Ing Keang depatan ya kabud ing tune, 

Tumayid king tau king banua at bie;

Lubus milunasan ing lua at pusan,

Karin abe na king keang kayarian.

___________________ 

Ing Pamilyang Atyu King Diyos

(Happy the Home Where God is There)

Ing pamilyang atyu king Diyos lugud ‘yang bubuklud

Sabla pasakup kang Jesus  at mamintung lubus.  

Ing pamilyang manalangin ating kapayapan

Nung ing pagsubuk man datang ing Diyos yang santungan.

Ing pamilyang manatili king iglesiang banal

Mangatmu ya king kanuanan at king kaligtasan.

O Ginu ing pamilya mi at kakaluguran

Ingatan mula’t panuanan ibie mung kasaupan. 

Ginu ibie mung bendisyun king pamilyang iti

Ban ing tula’t kapayapan lugud manatili. Amen.  

___________________  

Ing Lugud na Yang Migligtas

      (Love Lifted Me)

Ing bie ku napun mitmung dinat at dalumdum

Ala mang makasaup, lalbug ku king dulum 

At ing panalangin ku, dimdam na ning Ginu 

Jesus din’tang ya ban iligtas naku.  

Koro: 

Ing lugud na yang migligtas, 

king taung misakab, Keang telakad.  

Ing lugud na yang migligtas, 

Ing kalam ning Ginu kakung tinggap. Amen.

Ing mabilug a bie ku, Kea ipagkalub 

Purian ke, at ‘yang suyuan, ing kaku malugud; 

King Ginu a menatbus king babo na ning krus . 

Mamintu kung tapat king Ginung Jesus. 

Ikong mikasala at mengalingwan king Diyos 

Mibalik ko king Ginu, ausan ye’ng Mangabus 

Bie mung mibabayatnan, king sakit at pusan

Lumapit ka kang Jesus maging mayan. 

Ngeni nung pasakup ka king Ginung malugud,

Lumapit ka ping agad, arap na siklaud;

Gumulut king dewakan, at marap ka king krus, 

Mabilug mung kaladua yang mikabus. 

____________________ 

Mal Ya King Pusu Ku Ing Kapilya

       (Church in the Wildwood)

Mal ya king pusu ku ing kapilya, tula ning bie ku ing samba,

Ibat pa king kakung kayanakan; Ing Ginu kaku neng liguran. 

Koro:

(Tara, ngeni ume) Tara ume king  kapilya, ban king Ginu tamu samba,

Purian ya ing Ginu king kasuyuan, dalangin at tanggap kanuanan. Amen!

Tara lungub tamu king kapilya at magaral king Biblia, 

Ituki talang kakaluguran, ila man  tanggap la king kalam. 

Makiramdam tamu at mamintu karing utus na ning Ginu, 

Sumuyu tang tapat karing tau at tairan la kang Jesu-Cristo. 

Mangatmu yang tula ing pusu ku balang samban ke’ing Ginu. 

Tune pin, king bie ku e ke kalinguan, kapilyang kakung keragulan.

________________  

Karin King Sabsaban

 (Away in a Manger)

Karin king sabsaban, ‘tiu ya mibait; 

Ing Ginu ning banua din’tang king sulip, 

Ding angel katasan ‘tiu la daralit, 

Ilang mamalita, “Ginu mibait.”

Pastul a maluka karelang dimdam, 

Mayap a balita, ibat katasan;

Atlung Mangabiasa, siniklaud ngan,

Simban de i Cristo, Diyos ning  sikluban. 

E muku lalakwan, Ginu na ning bie, 

Saupan Mu ku Jesus, ikang matnube; 

Bukud kung aligan, kakung sikanan,

Kabang mabibie ku, ika mung suyuan. 

King benging payapa aduan ku Ginu, 

Banten dakung angel king pagkeran ku;

Magpiak kung payapa, neng matudtud ku,

At balu kung tune,  babanten muku. Amen.

___________________

Mekeni Sumulung
(Tune: Onward Christian Soldiers)

Mekeni  sumulung,  iglesia  ning Diyos.
Kimut at  makibat, tuki king aus;
King balang  Kristiano, Diyos ya’ng migkalub.
Lakas ban sumuyu, king Ginung Jesus.

Koro:
Mekeni sumulung, tupad king aus;
Angga’ng magtagumpe, kayarian ning Diyos.  Amen.

Dalan  yang katutuan, lugud at sala,
ban  ding sablang tau miligtas la sa;
Propeta’t apostol, ating balita.
Lugud nang Cristong nuan, tanggapan da sa.

Ngeni misanmetung, Iglesiang banal,
tagumpe ning metung, tagumpe ta ngan;
Ding sablang meyaus, tuki kang Jesus
sabian ya’ng Balita: “Lugud ya ing Diyos.” 

_________________

King Malumeme Siwala
(Whispering Hope)

King malumeme siwala angel banua daralit
Karing tau  da papakit Diyos tinipa ya sulip.
Manaya, dulum  ala na ing sala dinatang "Ya,
At atyu ne ing pag-asa ding taung manenaya.

Koro:
Kapanayan, ning yatu, a dinatang
Ding pusu mi, mangatmu lang kalam.  Amen.

Sabian tamu ing balita, king yatung manenaya
Ding king lungkut tumula la, ing Diyos ti'ne tinipa.
Takut, danup miwakasan, tanggap tamung kanuanan
Uling i Jesus dinatang  Magligtas ning sikluban.

Koro:
Kapanayan, ning yatu, a dinatang
Ding pusu mi, mangatmu lang kalam.  Amen.



___________________________________

King Bethlehem Mibait Ya (Jestril Alvarado)
(In Bethlehem ‘Neath Starlit Skies)

King Bethlehem mibait 'Ya, Allelujah! Allelujah!
Ing bingut ibat banua, Allelujah! Allelujah!
Alang lugal para Kea, kang Jose at kang  Indung Maria,
King sabsaban metudtud ya,  Allelujah! Allelujah!

Angel ning banua migkanta,  Allelujah! Allelujah!
Pastul king marangle, at ding tupa,  Allelujah! Allelujah!
Ating batuin karin banua, ing tala ning Ginung tinipa,
Ding Atlung Hari tikian de, Allelujah! Allelujah!

Ngeni daratang ya ing Ginu, Allelujah! Allelujah!

Isadia la ding pusu yu, Allelujah! Allelujah!
Paluban 'Ya at tanggapan, ing Diyos king yatu dinatang!
King dalit kekayung purian, Alleluyah! Alleluyah! 

_________________________


O  Kapayapan Kekayu  
(God Rest You Merry Gentlemen)

O kapayapan kekayu, e mababalisa, 
Uling king aldo a iti, Jesus mibait ya,
Ban miligtas ya ing tau king pamikasala. 

Koro:
O - balita ning kaligtasang ibat king Diyos,
O - balitang tungkol kang Jesus. Amen.

Menibatan king banua, angel daralit la, 
Karing pastul king marangle, balita dela da, 
“Karin king belen Bethlehem, bingut matudtud ya."

E kayu mitatakutan, ing Diyos malugud ya, 
Ing katasan likuan na ya, king yatu tinipa
Mikyabe ya karing tau, ngeni abe ta ya. 

Ngeni purian ta 'Yang lubus, ing Ginu ning banua,
O dalit ko king Mangabus  ikayung anak na, 
At kekayung pamalita, ing Diyos malugud 'ya!
___________________________